མཁོ་མ ༼མཁོ་མོ༽ རྒེད་འོག་གི་ལོ་རྒྱུས་མདོར་བསྡུས།།
ལྷུན་རྩེ་རྫོང་ཁག་གི་འོག་ལུ་ཡོད་པའི་ མཁོ་མོ་རྒེད་འོག་འདི་ ལྷུ་རྩེ་ཁྲོམ་ལས་ཀི་ལོ་མི་ཀྲར་ལྔ་དེ་ཅིག་གི་ས་ཁར་ཆགས་ཏེ་ཡོདཔ་ཨིན། འདི་ནང་གི་མི་སེར་ཚུ་ ཡོངས་གྲགས་ལུ་སྐུ་ཤུ་འཐག་རས་འཐག་སྟེ་ འཚོ་བའི་གནས་སྟངས་ཡང་ འདི་ལུ་བརྟེན་ཏེ་སྡོད་དོ་ཡོདཔ་ཨིན་མས། མཁོ་མོ་ཟེར་བའི་ལོ་རྒྱུ་འདི་ ཨྱོན་གུ་རུ་རིན་པོ་ཆེ་གིས་ “ང་ལ་མཁོ་བའི་མོ་ཞིག་འདུག་” ཟེར་གསུང་བའི་ཞལ་ཚིག་འདི་ལས་དར་ཁྱབ་འགྱོ་ནུག། དེ་ཡང་ཧེ་མ་ཨྱོན་གུ་རུ་རིན་པོ་ཆེ་མཆོག་ མཚོ་བདག་ཟེར་ད་རེས་ནང་པར་མཁོ་མའི་གནས་པོ་འབད་ཡོད་མི་འདི་ དམ་ལ་བཏགས་ནི་གིས་དོན་ལུ་གསང་བ་ཟླ་དྲུག་ཟེར་མཁོ་མའི་གཡུས་ཀྱི་བལྟག་ལུ་ཡོད་པའི་ གནས་ཀྱི་བྱག་ཕུག་འདི་ནང་ ཟླ་གྲངས་དྲུག་གསང་བའི་ངང་ལུ་སྒོམ་གནང་སྟེ་བཞུགཔ་ད་ ས་གནས་ཐེམ་སྦྲང་ཟེར་ས་གསང་བའི་ཟླ་དྲུག་གི་གཡོན་ཕྱོགས་ལུ་ཡོད་པའི་ས་གནས་འདི་ནང་ལས་ བུམོ་ལོ་ན་གཞནམོ་བཀྲིས་འཁིའུ་མགྲོན་ཟེར་མི་ཅིག་ནོར་རྫིཔ་འབད་སྡོད་པའི་སྐབས་ལུ་ མཁའ་འགྲོ་ཡེ་ཤེས་མཚོ་རྒྱལ་དང་ཅིག་ཁར་མཇལ་ཏེ་ མོ་གིས་མཁའ་འགྲོ་ལུ་ཨོམ་དམ་སྦྱི་གང་ཕུལ་ནུག། དེ་སྒང་ མོ་ཡང་མཁའ་འགྲོ་མའི་སྣམ་སྤྲུལ་ཅིག་འོང་ནི་ཨིན་མས་ཟེར་ཐུགས་བཞེས་གནང་སྟེ་ གུ་རུ་རིན་པོ་ཆེ་བཞུགས་སར་འཁྱིཝ་ད་ ཨྱོན་གུ་རུ་རིན་པོ་ཆེ་མཆོག་གིས་ '’ང་ལ་མཁོ་བའི་མོ་ཅིག་འདུག’’ཟེར་གསུང་གནངམོ་ལས་ ད་རེས་ནང་པར་ གཡུས་ཀྱི་མིང་ལུ་མཁོ་མོ་ཟེར་སླབ་སྲོལ་ཡོདཔ་ཨིན། རྒྱུ་མཚན་འདི་འབདཝ་ལས་བརྟེན་ཏེ་ ད་ལྟོ་གི་འབར་ན་ཡང་ མཁོ་མོའི་གཡུས་ཚན་འདི་ནང་མཁའ་འགྲོ་རེ་རྒྱུན་ཆད་མེད་པར་འཁྲུང་ནི་ཡོད་ཟེར་སླབ་སྲོལ་འདུག།
- རྒེད་འོག་འདི་ནང་ཡོད་པའི་མི་སེར་མང་ཤོས་ཀྱིས་རང་ མཁོ་མོ་ཟེར་མ་ཏོགས་མཁོ་མ་ཟེར་སླབ་གསོལ་མེད་རུང་ ཡིག་ཐོགས་ལུ་མཁོ་མ་ཟེར་ བཀོད་ཡོད་མི་འདི་རྒྱུ་མཚན་ག་ཅིག་འབད་ཨིན་ན་ཧ་གོ་མ་ཚུགས།
མཁོ་མོཔ་ཀུན་བཟང་རྡེ་རྗེ།
